የመናውያን ፍትሓዊ መስርሕ ዑቕባ ክረኽቡ መሰል ዘለዎም ክነሶም ካብ ኔዘርላንድ ይወጽኡ

ኣብ ዝሓለፉ 3 ኣዋርሕ ሰደቓ-ሓገዝ

ኣብ ኔዘርላንድ ሰፊሕ መርበብ ዘለዎም የመናውያን ከም ዝሕብርዎ፣ ድሮ 200 ሰባት ካብ ኔዘርላንድ ወጺኦም ኣለዉ። እዚ RefugeeHelp ንኸጻርይ ብማሕበራዊ መራኸቢታት ካብ ዘቕረቦ ሕቶ እዩ ተጋሂዱ። ዝወጽእሉ ምኽንያታት ድማ፡

• ኣብ ኔዘርላንድ ፍቓድ ዑቕባ ኣይንረክብን ኢና ኢሎም ስለ ዝፈርሑን፣

  ኣገልግሎት ኢሚግሬሽንን ዜግነትን (IND)
  ውሳኔ ክሳብ ዝወስድ ነዊሕ ግዜ ክወስድ እዩ ዝብል ስግኣት ስለዝሓደሮምን።

• ካብ ካልኦት ሃገራት ብዝመጽኡ ሰባት ካብ ዝቐርቡ ሕቶታት ዑቕባ ንላዕሊ፣ ናይ የመናውያን ሕቶታት ዑቕባ ዝያዳ ብጥብቂ ዝግምገም ኮይኑ ከም ዝስምዖም ድማ ይሕብሩ።

መንግስቲ ኔዘርላንድ ሕጂ እውን ካብ የመን ዝመጽኡ ሰባት ብሰንኪ ኲናት ኣብ ሓደጋ ክወድቁ ከምዝኽእሉ ይኣምን እዩ። ካብ መጋቢት 2024 ጀሚሩ ግን፣ IND ካብ የመን ብዝመጽኡ ሰባት ንዝቐርቡ ሕቶታት ዑቕባ ደጊም ብኣውቶማቲክ ኣየጽድቕን እዩ። ካብ የመን እንተድኣ መጺእካ ሕጂ እውን ናይ ዑቕባ ፍቓድ ናይ ምርካብ ዕድል ኣለካ። ስለዚ ካብ የመን እንተድኣ መጺእካ ደጊም ፈጺሙ ዑቕባ ናይ ምርካብ ዕድል የብልካን ዝብል ሓቂ ኣይኮነን።

ሕጂ ካብ የመን ብዝመጽኡ ሰባት ዝቐርቡ ሕቶታት ዑቕባ፣ ልክዕ ከምቶም ካብ ካልኦት ሃገራት ብዝመጽኡ ሰባት ዝቐርቡ ሓደ ዓይነት ኣተሓሕዛ እዩ ዝግበረሎም። ኣብ የመን ንምንታይ ኣብ ሓደጋ ከም ዘለኻ ብመርትዖ ከተርእይ እንተኽኢልካ፣ ሕጂ እውን መንበሪ ፍቓድ ክትረክብ ትኽእል ኢኻ። ንኣብነት ብሰንኪ እዚ ዝስዕብ ኣብ ሓደጋ ትርከብ ምስ እትኸውን፡

• ብሰንኪ እትሰርሖ ስራሕ።

• ኣባል ናይ ሓደ ሃይማኖታዊ ውሑዳን ስለ ዝኾንካ።

• ብሰንኪ ፖለቲካዊ ንጥፈትካ።

• ብሰንኪ ካልኦት ውልቃዊ ኩነታት ቀልጢፍካ ግዳይ ዓመጽ ኲናት ናይ ምዃን ተኽእሎኻ ልዑል ስለዝኾነ።

ካብ የመን ዝመጽኡ ሰባት ኣብ ኔዘርላንድ ዑቕባ ናይ ምርካብ ዕድል ዳርጋ የብልናን ኢሎም ዝሓስቡ እኳ እንተኾኑ፣ እዚ ግን ሓቂ ኣይኮነን። ኮይኑ ግን ብዝሒ ዝጸድቚ ሕቶታት ዑቕባ የመናውያን ነፍስወከፍ ወርሒ እናነከየ ይኸይድ ኣሎ። ኣሃዛት Eurostat ከም ዘመልክቶ፣ ኣብ ወርሒ ሓምለ፣ ነሓሰን መስከረምን፣ ካብ 85 የመናውያን 20 ጥራይ እዮም ዑቕባ ረኺቦም።

ካብ ሰደቓ-ሓገዝ ናይ VWN ዝተረኽበ መረዳእታ ከም ዘመልክቶ፣ ብዙሓት ዝተነጽጉ ሕቶታት ዑቕባ ርትዓዊ ከም ዘይኮኑ የርእይ። መብዛሕትኡ ግዜ ድማ ጠበቓታት ኣብዞም ዝተነጽጉ ዑቕባ የመናውያን ብዓወት ተማጒቶም ይረትዑ እዮም። ብዙሓት ዳያኑ ምስቲ ናይ IND ውሳኔ ኣይሰማምዑን እዮም፣ ከምኡ እውን እቲ ጉዳይ ከም ብሓድሽ ክረኣይ ኣለዎ ዝብል እምነት ኣለዎም። ከም ውጽኢቱ ድማ ብዙሓት የመናውን ላዕለዋይ ይግባይ ብምቕራብ ገና መንበሪ ፍቓድ ክረኽቡ ይኽእሉ እዮም። ስለዚ VWN፣ ብፍላይ ናይ ዑቕባ ሕቶኻ 1ይ ግዜ እንተድኣ ኮይኑ ተነጺጉ፣ ሕጋዊ ሓገዝን ምኽርን ምሕታት ኣገዳሲ ምዃኑ የስምረሉ።