ኣብ ኔዘርላንድ ፍቓድ መዘወሪ መኪና ብኸምዚ ኢኻ ትረክብ
ኣብ ኔዘርላንድ ፍቓድ ምዝዋር መኪና ክትረክብ ትደልይ ዲኻ? ስለዚ ትምህርቲ ምዝዋር መኪና ትከታተል፣ ከምኡ እውን ናይ ክልሰ-ሓሳብን ግብራውን ፈተናታት ትወስድ። እዚ ብኸመይ ከም ዝሰርሕን እንታይ ክትገብር ከም ዘለካን ኣብዚ ዓንቀጽ ከተንብብ ትኽእል ኢኻ።
ፍቓድ መዘወሪ መኪና ንምርካብ ሒደት ስጉምትታት ክትክተል ኣለካ፡
ግብራዊ ትምህርቲ ትከታተል። ኣብዚ ትምህርቲ እዚ ከም በዓል ምቕይያር ማርሻ፣ ምምራሕ መኪና፣ ምቛም መኪና ዝኣመሰሉ መሰረታዊ ብቕዓት ምዝዋር መኪና ትመሃር። ግን ድማ ብኸመይ ኣብ ትራፊክ ብውሕስነት ከም እትሳተፍ እውን ትመሃር። ካብቲ ኣብ መኪና ኣብ ጎንኻ ኮፍ ዝብል መምህር ምዝዋር መኪና ድማ ምርሒት ትረክብ።
ናይ ክልሰ-ሓሳብ ፈተና ትወስድ። እዚ ፈተና እዚ ብዛዕባ ምልክታት ትራፊክ፣ ሕግታትን ኩነታትን ትራፊክ ዘለካ ኣፍልጦ፣ ከምኡ እውን ሓደገኛ ኩነታት ኣቀዲምካ ናይ ምግምጋም ዓቕምኻ ይፍትን። መብዛሕትኡ ግዜ ግብራዊ ትምህርትኻ ምስ ጀመርካ ኢኻ ነቲ ፈተና ትወስዶ።
ግብራዊ ፈተና ትገብር። ናይ ምዝዋር መኪና መምህርካ ጽቡቕ ክትዝውር ከም እትኽእል እንተሓሲቡን፣ ናይ ክልሰ-ሓሳብ ፈተናኻ እንተድኣ ሓሊፍካን፣ ግብራዊ ፈተና ክትገብር ትኽእል ኢኻ። እቲ ፈተና ብናትካ ቤት-ትምህርቲ ምዝዋር መኪና እዩ ዝሕተት። እዚ ፈተና
ግብራዊ ትምህርቲ ንምክትታል፣ ቤት-ትምህርቲ ምዝዋር መኪና ምረጽ። ድሕሪ ምምራጽ ድማ ኣብዚ ቤት-ትምህርቲ ምዝዋር መኪና ተመዝገብ። ኣብያተ-ትምህርቲ ምዝዋር መኪና፣ ምዝዋር ንኽትመሃር ዝሕግዙኻ መምህራን ኣለወን። ኣብያተ-ትምህርቲ ምዝዋር መኪና መብዛሕትኡ ግዜ ብርክት ዝበሉ ትምህርትታት ምዝዋር፣ ፈተና ክልሰ-ሓሳብን ግብራዊ ፈተናን ዘጠቓልሉ ዝተፈላለዩ ጥምሮታት የቕርባ እየን።
ፍቓድ መዘወሪ መኪና ንምርካብ ዘድልይ ወጻኢታት ክፈላለይ ይኽእል እዩ። ብማእከላይ ገምጋም ሰባት ቅድሚ ግብራዊ ፈተና ምውሳዶም ከባቢ 40 ክፍለ-ትምህርቲ የድልዮም። ልክዕ ወጻኢታት ግን ክንደይ ክፍለ-ትምህርቲ ዘድልየካ ኣብ ምዃኑን፣ ነቲ ፈተና ብ1 ግዜ ክትሓልፎ ትኽእል ኣብ ምዃንካን ዘይምዃንካን እዩ ዝምርኮስ። ኣብዚ ታሕቲ ዋጋታት ትምህርቲ ምዝዋር መኪናን ፈተናታትን ብማእከላይ ገምጋም ክንደይ ምዃኑ ክትረክብ ኢኻ፡
ፈተና ክልሰ-ሓሳብ፡ ኣስታት €50።
ግብራዊ ትምህርቲ፡ ንሓደ ክፍለ-ትምህርቲ ኣስታት €40-€50።
ግብራዊ ፈተና፡ ኣስታት €250።
ንፍቓድ መዘወሪ መኪና ዝኸውን ናይ ክልሰ-ሓሳብ ፈተና፣ ካብ ቋንቋ ኔዘርላንድ ወጻኢ ብኻልእ ቋንቋ ክትገብር ኣይከኣልን እዩ። ቋንቋ ኔዘርላንድ የጸግመካ ድዩ? ስለዚ ናይ ክልሰ-ሓሳብ ፈተና ብኣተርጓሚ ክትወስድ ትኽእል ኢኻ። ስለዚ ድማ ኣብ እዋን ፈተና ምስ ሰራሕተኛ ናይ CBRን ኣተርጓሚን ኣብ ፍሉይ ክፍሊ ኮፍ ትብል።
ኣተርጓሚ ንምጥቃም ዝኸውን ወጻኢታት ብቐጥታ ናብቲ ናይ ኣተርጓሚ ኣገልግሎት ኢኻ እትኸፍሎ። ኣብ CBR ንዝግበር ብውልቂ ቚጽጽር ዝካየደሉ ፈተና እውን ተወሳኺ ትኸፍል።
ድሕሪ ምሕላፍካ ካብ CBR ናይ ውጽኢት ቅጥዒ ክትቕበል ኢኻ። እዚ ቅጥዒ፣ ከም ዝሓለፍካን ፍቓድ መዘወሪ መኪና ንምርካብ ከተመልክት ከም እትኽእልን ዝገልጽ እዩ። ነቲ ናይ ውጽኢት ቅጥዒ ሒዝካ ናብቲ ተመዝጊብካ ትርከበሉ ምምሕዳር ከተማ ትኸይድ። ኣብኡ ድማ ፍቓድ መዘወሪ መኪናኻ ንኽትረክብ ተመልክት። ንኸተመልክት እዞም ዝስዕቡ ሰነዳት ከድልዩኻ እዮም፡
ሕጋዊ መረጋገጺ መንነት፣ ፓስፖርት ወይ ወረቐት መንነት ዝኣመሰለ።
ወግዓዊ ሕግታት ዘማልእ ናይ ቀረባ እዋን ናይ ፓስፖርት ስእሊ
ናይ ግብራዊ ፈተናኻ ናይ ውጽኢት ቅጥዒ። CBR መብዛሕትኡ ግዜ ነዚ ብዲጂታል ናብ ምምሕዳር ከተማ የመሓላልፎ እዩ።
መመልከቲ ድሕሪ ምቕራብካ መብዛሕትኡ ግዜ ፍቓድ መዘወሪ መኪናኻ ክብሳ ዝዳሎው 5 ናይ ስራሕ መዓልታት ይወስድ። ፍቓድ መዘወሪ መኪና ገንዘብ ይሓትት እዩ። ክንደይ ክትከፍል ከም ዘለካ ኣብቲ ምምሕዳር ከተማ እዩ ዝምርኮስ፣ እንተኾነ ግን ኣስታት €50 ይሓተካ።