እቲ መርመራ ጥንስቲ ምዃንኪ እንተድኣ ሓቢሩ ምስ ሓኪምኪ ቆጸራ ግበሪ። ዋላ ብዛዕባ ውጽኢት ናይቲ መርመራ ጥርጣረታት ምስ ዝህልወኪ እውን ናብ ሓኪምኪ ክትከዲ ትኽእሊ ኢኺ። እንተድኣ ብርግጽ ጠኒስኪ ኮይንኪ፣ ሕጂ እንታይ ከም ዘድልየኪ ምስ ሓኪምኪ ተዘራረቢ። ብዝኾነ 2 ምርጫታት ኣለዉኺ፡ 

• ክትጠንሲ ባህግኺ እዩ፣ ቆልዓ ክትወልዲ ድማ ትደልዪ ኢኺ።

• ዘይሓሰብክዮ ኢኺ ጠኒስኪ፣ ስለዚ ድማ ነቲ ጥንሲ ከተቋርጽዮ ትደልዪ ኢኺ።

እቲ ዝበለጸ ውሳኔ እንታይ ምዃኑ ዘይፈለጥክዮ ክትኮኒ ትኽእሊ ኢኺ። ተወሳኺ ሓበሬታ ምስ ዘድልየኪ ወይ ዝኾነ ጥርጣረ ምስ ዝህልወኪ፣ ምስ ሓኪምኪ ክትመያየጢ ትኽእሊ ኢኺ። ድሕሪ እቲ ዝርርብ ገና ርግጸኛ እንተድኣ ዘይኮንኪ ድማ እንደገና ምስ ሓኪምኪ ክትዘራረቢ ትኽእሊ ኢኺ።

ምስ ሓኪምኪ ክትመያየጢ እንተድኣ ዘይትደልዪ ኮይንኪ፣ ምስ ፍሉይ ክሊኒክ ብስም-ኣልቦ ማለት ስምኪ ከይጠቐስኪ ቆጸራ ክትሕዚ እውን ትኽእሊ ኢኻ። ኣብኡ ድማ መጀመርታ ምስ ሓደ ቅኑዕ ምርጫ ንኽትገብሪ ክሕግዘኪ ዝኽእል ዶክተር ትዘራረቢ።

እቲ ሓኪምኪን እቲ ኣብቲ ክሊኒክ ዝርከብ ዶክተርን፣ ንምስጢራዊ ሓበሬታኺ ንኻልኦት ከካፍሉ ዘይፍቀደሎም ምዃኑ ምፍላጥ ጽቡቕ እዩ። እዚ ድማ 'ሞያዊ ምዕቃብ ምስጢር' ይበሃል።

ነቲ ጥንሲ ከተቋርጽዮ እንተድኣ መሪጽኪ፣ ሕክምና ንምግባር ውጥን ትገብሪ። ነቲ ጥንሲ ንምቚራጽ ሓያሎ ኣማራጺታት ኣለዉ። ኣየናይ ኣማራጺ ምስ ኩነትኪ ብዝበለጸ ከም ዝሰማማዕ ድማ ምስ ሓኪምኪ ትመያየጢ።

ኹሎም ዘለዉ ኣማራጺታት ኣብ ኔዘርላንድ ሕጋውን ውሕስነት ዘለዎምን እዮም። እቶም ሕክምናታት፣ ኣብ ዳሕራይ ግዜ ክትጠንሲን ቆልዓ ክትወልዲን ምስ እትደልዪ እውን ንዓኺ ኣሉታዊ ሳዕቤናት የብሎምን።

እቲ ዕሸል ካብ ኣካል ወጻኢ ብህይወት ክነብር ክሳብ ዝኽእለሉ ኣብ ዘሎ ግዜ ጥንስኺ ንምቚራጽ ይፍቀድ እዩ። እዚ ማለት ድማ ክሳብ መበል 24 ሰሙን ናይ ጥንሲ ኣብ ዘሎ ግዜ ምንጻል ጥንሲ ይፍቀድ ማለት እዩ። ካብኡ ድሒርካ ዝግበር ምቚራጽ ጥንስኺ ዝከኣል ኣዝዩ ከቢድ ናይ ጥዕና ጸገማት ምስ ዝህሉው ጥራይ እዩ።

ቆልዓ ክትወልዲ ከም እትደልዪ እንተድኣ ወሲንኪ፣ ሓኪምኪ ንዓኺን ምናልባት እውን ንመጻምድትኺን በዓል-ሞያ ስነ-መወልዳን ኣብ ምርካብ ክድግፈኩም ይኽእል እዩ። ኣብ እዋን ጥንሲ ግቡእ ክንክንን ምርሒትን ንምርካብ ብቕልጡፍ ምስ በዓል-ሞያ ስነ-መወልዳን ርክብ ምግባር ኣገዳሲ እዩ።