ኣብ ኔዘርላንድ ህዝባዊ መጓዓዝያ ብኸምዚ እዩ ዝሰርሕ

ኩሉ ግዜ ብቚዕ ትኬት ከምዘለካ ከተርእይ ክትክእል ኣለካ። እዚ ድማ ናይ ወረቐት ካርድ ክኸውን ይኽእል እዩ። ወይ ብእኡ ዝኣተኻሉ ናይ ህዝባዊ መጎዓዝያ ቺፕ ካርድ። ወይ ድማ ብምትንካፍ ኣልቦ ክትከፍለሉ እትኽእል ዝኣተኻሉ ናይ ባንክ ካርድ። ብቚዕ ትኬት የብልካን ዲኻ? ስለዚ ኣብ እዋን ቚጽጽር መቕጻዕቲ ክወሃበካ ይኽእል እዩ።

ናይ 2ይ ማዕርግ ትኬት እንተድኣ ኮይኑ ዘለካ፣ ኣብ 1ይ ማዕርግ ኮፍ ክትብል ኣይፍቀደልካን እዩ። እዚ ትገብር ዲኻ? ስለዚ ኣብ እዋን ቚጽጽር ክትቅጻዕ ትኽእል ኢኻ።

ኣብ ባቡር ወይ ሜትሮ ብሽክለታ ምሳኻ ክትማላኣ ትኽእል ኢኻ። ግን ኣብ ሞንጎ ሰዓት 09፡00ን 16.00ን፣ ከምኡ እውን ድሕሪ ሰዓት 18.30 ጥራይ እዩ። ንብሽክለታኻ ዝኸውን ፍሉይ ናይ ብሽክለታ ትኬት ክትገዝእ ድማ ኣለካ። ኣብ ኣውቶቡስ ብሽክለታ ምሳኻ ክትማላእ ፈጺሙ ኣይፍቀደልካን እዩ።

ኣብ ዓረብያ ስንኩላን ዲኻ ዘለኻ? እኹል ቦታ ምእንቲ ክህልወካ ነዚ ዝኸውን ፍሉይ ቦታታት ኣሎ። እዚኦም መብዛሕትኡ ግዜ ዓረብያ ሕጻናት እውን ከተቐምጠሎም እትኽእል ቦታታት እዮም።

ኣብ ኩሉ ህዝባዊ መጓዓዝያ ሽጋራ ምትካኽ ክልኩል እዩ። ኤለክትሮኒካዊ ሽጋራ ምትካኽ እውን ከምኡ። ኣብ መደበራት ባቡርን ኣብ ገሊኦም መዕረፊ ኣውቶቡሳትን እውን ሽጋራ ከተትክኽ ኣይፍቀደልካን እዩ። እዚ ትገብር ዲኻ? መቕጻዕቲ ክወሃበካ ይኽእል እዩ።

ኣብ ህዝባዊ መጓዓዝያ ዘየድሊ ናይ ድምጺ ረብሻ ኣይትግበር፣ ጐሓፍ ድማ ኣብ ባይታ ኣይትደርብይ።

ኣብ ባቡር ሓደ ሓደ ግዜ ናይ ስቕታ ባጎኒታት ኣለዉ። እዚ ኣብ መስኮትን ኣብቲ ባጎኒን ተሓቢሩ ይርከብ። ኣብዚ ጠቕላላ ስቕ ክትብል ኣለካ።