ግብሪ ምኽፋል

ካብ ኣታዊኻ ግብሪ ክትከፍል ኣለካ። ምስ ኣስራሒ ትሰርሕ እንተድኣ ኮይንካ፣ ግብሪ ብኣውቶማቲክ ካብ ደሞዝካ እዩ ዝኽፈል። እዚ ደገፍ ጥቕሚታት ትረክብ ምስ እትኸውን እውን ብኣውቶማቲክ እዩ ዝኸውን። በዓል ዋኒን እንተድኣ ኮይንካ ባዕልኻ ክትቅምሮን ግብሪ ክትከፍልን ኣለካ።

ኣብ ዓመት ሓደ ግዜ በዓል-መዚ ግብሪ ኔዘርላንድ ብዛዕባ ኣታዊኻ ዝምልከቱ መረዳእታታት ብዲጂታላዊ ክትመልእ ክሓቱኻ እዮም። እዚ ድማ 'belastingaangifte' ተባሂሉ ይጽዋዕ። እዚ ዓመታዊ ኣብ መንጎ 1 መጋቢትን 1 ሚያዝያን ክትገብሮ ኣለካ። በዓል-መዚ ግብሪ ኣብ ዝሓለፈ ዓመት ካብ ኣታዊኻ እኹል ግብሪ ዝኸፈልካ ምዃንካን ዘይምዃንካን ይቕምሮ። ሓደ ሓደ ግዜ ተወሳኺ ክትከፍል ኣለካ ወይ ድማ ተመላሲ ገንዘብካ ትቕበል።

በዓል-መዚ ግብሪ ኔዘርላንድ 'belastingaangifte' ክትመልእ ክሕግዙኻ ይኽእሉ እዮም። ነዚ ብዝምልከት ብመስመር ሓበሬታ ግብሪ ቆጸራ ክትሕዝ ትኽእል ኢኻ፡ (0800) 05 43። ካብ ሰኑይ ክሳብ ሓሙስ ካብ ሰዓት 08፡00 ክሳብ 20፡00 ከምኡ እውን ዓርቢ ካብ ሰዓት 08፡00 ክሳብ 17፡00 ክትድውል ትኽእል ኢኻ።

ልዕሊ ዓቐን ግብሪ ኣታዊ እንተድኣ ከፊልካ፣ ካብ በዓል-መዚ ግብሪ ኔዘርላንድ ገንዘብ ክምለሰልካ ይኽእል እዩ። እዚ ድማ 'belastingteruggave' ይበሃል።

ንገለ ክፋል ናይቲ ዓመት ኣብ ማእከል ሓተቲ ዑቕባ (AZC) ትነብር እንተድኣ ኮይንካ፣ ነቲ 'M-ፎርም' ዝበሃል ተጠቒምካ 'belastingteruggave' ክትረክብ ትኽእል ኢኻ። እቲ 'M-form' ኣብ ዓመት ናይ ስደት ወይ ኢሚግረሽን እትመልኦ ቅጥዒ እዩ።

ከም ንቡር ኣሰራርሓ፣ ነቲ 'M-ፎርም' ክሳብ 1 ሓምለ ናይቲ ዝቕጽል ዓመት ናብ በዓል-መዚ ግብሪ ኔዘርላንድ ከተረክቦ ኣለካ። ኣስተውዕል፡ ምምሕዳር ከተማ ነቲ ተመላሲ ገንዘብ ከም ኣታዊ ዝርእዮ ክኸውን ይኽእል እዩ። ምምሕዳር ከተማ ነዚ ካብቲ ናትካ ማሕበራዊ ደገፍ ጥቕሚ ክቖርጾ እዩ። ቅድሚ ነቲ ቅጥዒ ምምላእካ ንምምሕዳር ከተማ ተወከስ።

ምስ ኣስራሒ ትሰርሕ እንተድኣ ኮይንካ፣ ገለ ክፋል ናይ ደሞዝካ ብኣውቶማቲክ ንመንግስቲ ትኸፍል። እዚ ድማ ናይ ኣታዊ ግብሪ ይበሃል። መጠን ናይቲ ክትከፍሎ ዘለካ ግብሪ ድማ ኣብ ብዝሒ ናይ ኣታዊኻ እዩ ዝምርኮስ። ኣታዊኻ ብዝለዓለ መጠን ድማ ዝያዳ ግብሪ ክትከፍል ኣለካ።

1. ኣብ 2025 ኣብ ዓመት ካብ € 0 ክሳብ € 38,441 ሓፈሻዊ ኣታዊ ዲኻ ትረክብ? ስለዚ ኣብ ደሞዝካ 35.82 ሚእታዊት ግብሪ ትኸፍል።

2. ኣብ 2025 ኣብ ዓመት ካብ € 38,441 ክሳብ € 76,817 ሓፈሻዊ ኣታዊ ዲኻ ክትረክብ? ስለዚ ካብቲ ልዕሊ € 38,441 ዝርከብ ሓፈሻዊ ደሞዝካ 37.48 ሚእታዊት ግብሪ ትኸፍል።

3. ኣብ 2025 ልዕሊ € 76,817 ሓፈሻዊ ኣታዊ ዲኻ ትረክብ? ስለዚ ካብቲ ልዕሊ € 76,817 ዝርከብ ሓፈሻዊ ደሞዝካ 49.50 ሚእታዊት ግብሪ ትኸፍል።

ኣብ ኔዘርላንድ ተቖጺርካ ዲኻ እትሰርሕ? ስለዚ ካብ ግብሪ ደሞዝካ ቅነሳ ክትረክብ መሰል ኣለካ። ሓፈሻዊ ቅነሳ ግብሪን ቅነሳ ግብሪ-ዕዮን ኣለዉ። ነዞም ቅነሳታት ብሓባር ድማ ቅነሳ ግብሪ-ደሞዝ ኢልና ንጽውዖም። ነዚ ቅነሳ ግብሪ-ደሞዝ ንምርካብ ካብ ኣስራሒኻ ወይ ብመንገዲ መዓል-መዚ ግብሪ ከተመልክት ትኽእል ኢኻ። ስለዚ ድማ ኣስራሒኻ ውሑድ ግብሪ ይኸፍል፣ በዚ ድማ ዝያዳ ​​ደሞዝ ትረክብ።

እትረኽቦ ቅነሳ ግብሪ-ዕዮ ብመሰረት ኣታዊኻ እዩ ዝቕመር። ኣብ 2025 እቲ ዝለዓለ ገደብ ቅነሳ ግብሪ-ዕዮ ኣብ ዓመት € 5,599 እዩ። € 43,071 ወይ ልዕሊኡ ኣታዊ ምስ ዝህልወካ ድማ እቲ እትረኽቦ ቅነሳ ግብሪ-ዕዮ እናነከየ ይኸይድ። ስለዚ እቲ ዝምልከተካ መጠን ቅነሳ ግብሪ-ደሞዝ ኣብ ብዝሒ ደሞዝካ እዩ ዝምርኮስ።

ኣስተውዕል፡ ኣብ ሓደ እዋን ንሓያሎ ኣስራሕቲ ትሰርሕ እንተድኣ ኮይንካ፣ ካብ 1 ኣስራሒ ጥራይ ኢኻ ቅነሳ ግብሪ-ደሞዝ ንምርካብ ከተመልክት እትኽእል። ንቅነሳ ግብሪ-ደሞዝ ኣብ ጥቕሚ ከተውዕሎ ትደልይ ዲኻ? ስለዚ ብዛዕባ እዚ ንኣስራሒኻ ሓብር።