ኣብ ኔዘርላንድ ዑቕባ ምስ እትሓትት ዘለዉ ዝተፈላለዩ ዓይነታት መዕቆቢ ቦታታት እዚኦም እዮም

መብዛሕትኡ ግዜ ኣብ ተር ኣፐል ንሓጺር ግዜ ኢኻ ትጸንሕ። ድሕሪ መስርሕ ምዝገባ ዝበዝሑ ሰባት ናብ ካልእ መዕቆቢ ይኸዱ። ኣብኡ ቦታ እንተዘይሃልዩ ግን ኣብ ተር ኣፐል ንነዊሕ እዋን ክትጸንሕ ተኽእሎ ኣሎ።

ኣብ ተር ኣፐል መጽለሊ፣ ከምኡ እውን ከም መግቢ፣ ዓራትን ሕክምናዊ ክንክንን ዝኣመሰሉ መሰረታዊ መሳለጥያታት ክትረክብ ኢኻ። ደጊም ኣብ ተር ኣፐል ቦታ የለን ድዩ? ስለዚ ሓደ ሓደ ግዜ ኣብ ከባቢ እቲ ማእከል ምዝገባ ኣብ ዝርከብ ግዝያዊ መዕቆቢ ቦታ ክትድቅስ ኣለካ።

ኣብ ጥቓ ቤት-ጽሕፈት IND ኣብ ዝርከብ መዕቆቢ እትጸንሓሉ ግዜ ካብ ሒደት ሳምንታት ክሳብ ኣዋርሕ ክወስድ ይኽእል። IND ውሳኔ ንኽወስድ ክንደይ ግዜ ዘድልዮ ኣብ ምዃኑን፣ ሕጽረት መዕቆቢ ቦታታት ዘሎ ኣብ ምዃኑን ዘይምዃኑን እዩ ዝምርኮስ። IND መንበሪ ፍቓድ ክትረክብ ምዃንካን ዘይምዃንካን ክሳብ ዝውስን ድማ ብዙሕ ግዜ ንኽትግዕዝ ክትግደድ ትኽእል ኢኻ።

ኣብ መዕቆቢ፣ መንበሪ ክፍሊ ምስ ካልኦት ሰባት ኢኻ ትካፈል፣ ከም መግብን ሕክምናዊ ክንክንን ዝኣመሰሉ መሰረታዊ መሳለጥያታት ድማ ትረክብ። ንጥፈታት ኣሎ ድዩ የለን፣ ወይ ደቅኻ ትምህርቲ ክረኽቡ ዝኽእሉ ምዃኖምን ዘይምዃኖምን ኣብ ነፍስወከፍ መዕቆቢ ቦታ ይፈላለይ እዩ።

ህጹጽ መዕቆቢ ንሒደት ሳምንታት ንኽትጸንሓሉ ዝዓለመ ግዝያዊ መፍትሒ እዩ። እንተኾነ ግን ዳርጋ ኩሉ ግዜ ብሰንኪ ሕጽረት መዕቆቢ ቦታታት ዝያዳ ግዜ እዩ ዝወስድ።

እዚኦም መዕቆቢ ቦታታት ግዝያዊ ስለ ዝኾኑ፣ ኣብኡ ዝርከቡ መሳለጥያታት መብዛሕትኡ ግዜ ቀለልቲ እዮም። ጥዕና ዘለዎ መግቢ፣ ሕክምናዊ ክንክንን ንደቅኻ ዝኸውን ትምህርትን ክትረክብ መሰል ኣለካ። እንተኾነ ግን መብዛሕትኡ ግዜ ባዕልኻ ክትክሽን ኣይትኽእልን ኢኻ፣ እትገብሮ ብዙሕ ንጥፈታት የለን፣ መብዛሕትኡ ግዜ ድማ ብዙሕ ብሕትና የብልካን።

ኣብ ማእከል መዕቆቢ ስደተኛታት (AZC) ንኽንደይ ዝኣክል ግዜ ከም እትጸንሕ ንምዝራብ ኣጸጋሚ እዩ። እዚ ንገለ ኣዋርሕ ክኸውን ይኽእል እዩ፣ ሓደ ሓደ ግዜ ግን 1 ዓመት ወይ ልዕሊኡ እውን ክኸውን ይኽእል። ነዚ መስርሕ ዑቕባኻ ክንደይ ግዜ ከም ዝወስድን፣ መንበሪ ፍቓድ እንተረኺብካ ንዓኻ ዝኸውን ገዛ ክሳብ ዝርከብ ክንደይ ግዜ ከም ዝወስድን እዩ ዝውስኖ።

ኣብ ማእከል መዕቆቢ ስደተኛታት (AZC) ካብ ካልኦት መዕቆቢ ቦታታት ንላዕሊ ዝያዳ መሳለጥያታት ኣለዉ። ከም መግቢ፣ መጽለሊን ሕክምናዊ ክንክንን ዝኣመሰሉ መሰረታዊ ነገራት ትረክብ ጥራይ ዘይኮነስ፣ ንጥፈታትን ሓገዝን እውን ኣሎ። ቆልዑት ናብ ቤት-ትምህርቲ ክኸዱ ይኽእሉ፣ በጽሒታት ድማ ትምህርቲ ቋንቋ ክከታተሉ ወይ ኣብ ኔዘርላንድ ንዝህልዎም መጻኢ ንምድላው ዝሕግዞም ደገፍ ክረኽቡ ይኽእሉ። ከም መጻወቲ ቦታታት፣ ኣብያተ-መጻሕፍቲን፣ ናይ ስፖርት ቦታታትን ዝኣመሰሉ ሓባራዊ ቦታታት ኣለዉ። መብዛሕትኡ ግዜ ስነ-ኣእምሮኣዊ ሓገዝን ሕጋዊ ምርሒትን እውን ይርከብ እዩ።