ሕርሲ ኣብ ኔዘርላንድ፡ 5 ደቂ-ኣንስትዮ ብዛዕባ ሚዛን ኣብ መንጎ ባህሊን ሓድሽ ልምድታትን

ሓናን ኣብ ቀረባ እዋን ኣብ ኔዘርላንድ 1ይ ውላዳ ክትሓርስ ትጽበይ ኣላ፣ ስድራ-ቤታ ምስኣ ስለዘየለዉ ድማ ሻቕሎት ከም ዘለዋ ትነግረኒ። "ኣብ ሶርያ ኣብታ ስድራ-ቤት ዝርከባ ብዕድመ ዝደፍኣ ደቂ-ኣንስትዮ፣ ድሕሪ ሕርሲ ብምኡዛት ዕጸዋት ይሓጽባኻ። ጸሎት ይግበር፣ ከምኡ እውን መረቕ፣ ኣሕምልትን ስጋ ዕየትን ይብላዕ" ትብል። "ሓደ ሓደ ግዜ ድማ ደርፍን ሳዕስዒትን ከይተረፈ ኣሎ።"

ሓናን ሻቕሎት ዘለዋ እኳ እንተኾነት፣ ካብ ክንክን ወሊድ ግን ተስፋ ትገብር እያ። ክንክን ወሊድ ንሓደስቲ ሓራሳት ኣደታት ኣብ ቤት ሓገዝ ዝህብ ኣገልግሎት እዩ። እዚ ንሓናን ሓድሽ እኳ እንተኾነ እቲ ሓሳብ ግን ህድኣት ይፈጥረላ እዩ። እዚ ኣብዚ እዋን ንዝሰኣነቶ ስድራ-ቤታ ቊሩብ ክኽሕስ ድማ ተስፋ ኣለዋ።

ለቲሽያ ዝተባህለት ኣደ 2 ቆልዑት ኡጋንዳዊት፣ ባህላ ናብ ኔዘርላንድ ከተምጽእ ከም ዝፈተነት ትነግረኒ። 'ክየገሮ' ዝበሃል ምኡዝ ዕጸዋት ካብ ኡጋንዳ ናብ ኔዘርላንድ ኣምጺኣ። እዚ ዕጸዋት ኣካል ሕጻን ንምሕጻብ ድሮ ንወለዶታት ክጥቀምሉ ዝጸንሑ እዩ። "ገለ ክፋል ኡጋንዳ ናብዚ ዘምጻእክዎ ኮይኑ ተሰሚዑኒ" ትብል። እዚ ወግዒ ድማ ዋላ እኳ ርሒቓ እንተሃለወት ምስ መበቆላ ዘለዋ ምትእስሳር ንኽስምዓ ሓጊዝዋ። 

ካዮንጎ ኣሹራ ዝተባህለት ካብ ኡጋንዳ ዝመጽአት ንውልቃ እንትነብር ኣደ ብዛዕባ ተመኩሮኣ ትነግረኒ፡ "ኣብ ኡጋንዳ ኣብ ገዛ ምሕራስ ማለት ኩሉ ሰብ ክሕግዝ ይመጽእ ማለት እዩ፣ ስድራ-ቤት፣ ጎረቤት፣ መሓዙትን ኣዕሩኽን። ፈጺምካ ንበይንኻ ኣይትሕደግን ኢኻ። ኣብዚ ኣብ ኔዘርላንድ ግን ኩሉ ሰብ ብስራሕ ዝተጸምደ እዩ። በዚ ሓደ ሓደ ግዜ ጽምዋ ይስምዓካ።"

ከምዚ ኮይኑ እናሃለወ ግን፣ ኣሹራ ኣብ ኔዘርላንድ ናይ ኣደነት ብልጫታት እውን ትርእይ እያ። ወለዲ ስራሕ ወይ ትምህርቲ ክቕጽሉ ዘኽእሎም መውዓሊ ሕጻናት ብምህላዉ ሕጉስቲ ምዃና ነገረትኒ። ገለ ነገራት ግን ምልማድ ይሓቱ እዮም፡ "ድሕሪ ሕርሲ ሕብስቲ እየ ረኺበ፣ ኣብ ገዛይ እንተዝኸውን ግን መደበኛ መኣዲ ምበላዕኹ ነይረ። ኣዝየ ጠምየ ነይረ" ትብል እናሰሓቐት።

ውላደይ ኣብ ኔዘርላንድ ኣብ ዝተወልደሉ እዋን፣ ልክዕ ከም ናይ እዚአን ደቂ-ኣንስትዮ ዝተሓዋወሰ ስምዒታት እዩ ነይሩኒ። ንዓይ እውን ኣብ መንጎ ባህሊን ሓድሽ ልምድታትን ዘዋጥር ግድል እዩ ነይሩ። ከምቲ ኣደይ ቀደም ኣብ ኡጋንዳ እትገብሮ ዝነበረት ምዉቕን ማሕበራዊ ቕርበት ዘለዎምን ተመክሮ ክረክብ ተስፋ ስለዝገበርኩ፣ ኣብ ገዛ ክሓርስ እየ መሪጸ። ኣብ ተመሳሳሊ እዋን ድማ ኣብ ኔዘርላንድ ኣብ ገዛ ንዝግበር ሕርሲ ዝወሃብ፣ ናይ ኔዘርላንድ ጽቡቕን ውሑስን ክንክን ክጥቀም ከም ዝኽእል እውን ፈሊጠ ነይረ።

ኮይኑ ግን ብሰንኪ ኣብ ዕርበቱ ዘጋጠመ ጸገማት ናብ ሆስፒታል ክኸይድ ስለ ዝተገደድኩ ኣብ ገዛይ ክሓርስ ኣይከኣልኩን። ይኹን እምበር ነቲ ሕርሲ ንድሕሪት ተመሊሰ ብኣወንታ እየ ዝጥምቶ። ንውላደይ ኣብ ሕቚፈይ ኣብ ዘእተዂሉ እዋን ድማ ኣደነት ኣብ ኩሉ ቦታ ሓደ ምዃኑ ተረዳእኩ፡ ማለት ናይ ጽንዓት፣ ፍቕርን ለውጥን ጉዕዞ እዩ።

እዚ ዛንታ ብኤስተር ሙዎምቢ ካብ RFG Media ምስ RefugeeHelp ብምትሕብባር ዝተጻሕፈ እዩ።