ንመጀመርታ ግዜ ምድማጽ: "ጸጋማውያን ሰልፊታት ንመርገጺኦም ክቃለሱ ተስፋ እገብር"

ሳልሕ መድመጺ ካርድ ኣብ ኢዳ ሒዛ ናብቲ ናይ ምርጫ ነቑጣ ከደት። መንነታ ድሕሪ ምቚጽጻር ድማ ናይ ድምጺ ቅጥዒ ተቐበለት። እቲ ቅጥዒ ናይ 26 ሰልፊታት ዝዝርዝር ዝሓዘ ኮይኑ፣ ናይ ነፍስወከፈን መርገጺ ዘለዎ እዩ። ሳልሕ ብቀይሕ እርሳስ ንሓደ ካብ እትፈትዋ ሰልፊ ዝመጸ ሰብ ዝምልከት ዓውዲ ብቀይሕ ሕብሪ ለኸየቶ።

ንሳልሕ ካብተን 26 ሰልፊታት 1 ሰልፊ ምምራጽ ቀሊል ኣይነበረን። ስለዚ ድማ እያ ቅድሚ ምርጫ ብዛዕባ ኩሎም ዝተፈላለዩ መርገጺታት ብዕምቆት ርድኢት ዝወሰደት። "ጸጋም ክመርጽ ከም ዝደልይ ድሮ ፈሊጠ ነይረ። ንሰብኣዊ መሰላት፣ ማዕርነትን ክሊማን ዝጣበቕ ሰልፊ እየ ዝመርጽ።" ሳልሕ፣ እቲ ሓድሽ መንግስቲ ብተመጣጣኒ ዋጋ ክንክን ጥዕናን ጽቡቕ ትምህርትን ኣብ ምቕራብን፣ ቅልውላው ኣባይቲ ኣብ ምፍታሕን ክሰርሕ እውን ትደልይ እያ።

ሳልሕ ኣብ መዳይ ጉዳያት ወጻኢ ሰልፊታት እንታይ ከም ዝደልያ እውን ትርእይ። "ኔዘርላንድ ብደረጃ ዓለም ፍትሓውን ተሪርን መርገጺ ከም እትሕዝ እተረጋግጽ ሰልፊ እየ ዝደልይ።"

ሳልሕ ኣብ የመን እውን ድምጺ ምሃብ ኣገዳሲ እዩ ነይሩ ኢላ ትሓስብ። "ኣብኡ ዝነበረ ምርጫ ግን ግሉጽ ኣይነበረን። እቲ ዘድመጽካዮ ኣብ መወዳእታ ኣብ ውጽኢት ዝንጸባረቕ ምዃኑ ኣይትፈልጦን ኢኻ። ከም ሳዕቤኑ ብዙሓት ሰባት ኣብ ምድማጽ ኣይኣምኑን ነይሮም። ሓደ ሓደ ግዜ ድማ ደቂ-ኣንስትዮ ድምጸን ክህባ እኳ ኣይፍቀደለንን ነይሩ። ጽቡቕ ኣጋጣሚ ኮይኑ ኣብ ከተማይ ከምኡ ክገብር ይኽእል ነይረ፣ ኣብ ውጽኢቱ ግን ምትእምማን ኣይነበረንን።"

ብተወሳኺ ኣብ መበቆል ሃገራ ዝተኻየዱ ምርጫታት ብልሽውና ዝነበሮም እዮም ትብል ሳልሕ። "ሰልፊታት ሓደ ሓደ ግዜ ንሰባት ድምጾም ንምርካብ ይኸፍላ ነይረን፣ እዚ ድማ ንኹሉ እቲ ስርዓት ዘይፍትሓዊ ይገብሮ።" ኣስዒባ ድማ፡ "ጽቡቕ ኣጋጣሚ ኮይኑ ኣብ ኔዘርላንድ ዝተፈልየ እዩ። ኣብዚ ብኸመይ ከም እተድምጽን፣ እቲ ድምጺ ብኸመይ ከምዝቑጸርን ንጹር እዩ።"

ሳልሕ ኣብ ኔዘርላንድ ዝካየዱ ምርጫታት ዝያዳ ንኹሉ ዝሓቁፍ ክኸውን ይግባእ ኢላ ትኣምን። “ኣብዚ ዘሎ ስርዓት ኣዝዩ ዝተሓላለኸ እዩ፣ ብዙሓት ሰልፊታትን ኣማራጺታት ኣብ መድመጺ ወረቐትን ድማ ኣለዉ።” ስለዚ ንሓደስቲ ዝመጽኡ ሰባት ብኸመይ ከም እተድምጽ ዝያዳ ሓበሬታ ምሃብ ጽቡቕ ሓሳብ ኮይኑ ይስምዓ። "ብኸምዚ መንገዲ ኣብ መድመጺ ነቑጣ እንታይ ክጽበዩ ከምዝኽእሉ ኣቐዲሞም ይፈልጡ፣ ዝኾነ ሃንደበትነት ድማ ኣየጋጥሞምን።"

ድሕሪ እቲ ምርጫ ኣብ ዘሎ መዓልቲ PVV ዝዓበየ ሰልፊ ምዃኑ ምስ ተረጋገጸ ንሳልሕ "ቅር ኢልዋ"። "እቲ ዓወት ኣብ ገለ ቦታ ተጸቢየዮ ነይረ እየ፣ ምኽንያቱ እቲ ሰልፊ ዓቢይ ሰዓብቲ ጉጅለ ከምዘለዎ ኣብ ዜና ርእየ ነይረ። ግን ብእኡ ሕጉስቲ ኣይኮንኩን። ጸጋማውያን ሰልፊታትት ንመርገጺኦም ክቃለሱ ድማ ተስፋ እገብር።"