ብመንገዲ ቤት-ጽሕፈት ዕዮ ስራሕ ክትደልይ ትኽእል ኢኻ

ኣብ መብዛሕትኦም ኣብያተ-ጽሕፈት ዕዮ ብኢንተርነት ክትምዝገብ ትኽእል ኢኻ። ኣካውንት ትፈጥር፣ ውልቃዊ ሓበሬታታትካን ብዛዕባ ክፉት ናይ ስራሕ ቦታ ዘለካ ምርጫታትን ድማ ትመልእ። ሲቪኻ እውን ኣብኡ ክትጽዕኖ ትኽእል ኢኻ። መልመልቲ ዝሰማማዓካ ክፉት ናይ ስራሕ ቦታ ምስ ረኸቡ ድማ በዚ ኣካውንት ክረኽቡኻ ይኽእሉ። ብርግጽ ኣብ ኢንተርነት ንዝተለጠፉ ክፉት ናይ ስራሕ ቦታታት እውን ባዕልኻ ግብረ-መልሲ ክትህብ ትኽእል ኢኻ።

ምስ መልመልቲ ስራሕ ውልቃዊ ርክብ ክትገብር ዲኻ ትመርጽ? ኣብ ብዙሓት ኣብያተ-ጽሕፈት ዕዮ ብኣካል ብምኻድ እውን ክትምዝገብ ትኽእል ኢኻ።

ስራሕ ምስ ረኸብካ፣ እቲ ቤት-ጽሕፈት ዕዮ ምስቲ ትካል ናይ ስራሕ ቃለ-መሕትት ንኽትገብር ከዋድደልካ እዩ። እንተድኣ ተቖጺርካ ድማ እቲ ትካል ነቲ ቤት-ጽሕፈት ዕዮ ይሕብሮ። ብድሕሪኡ እቲ ቤት-ጽሕፈት ዕዮ ነቲ ብስራት ንኽነግረካ ምሳኻ ርክብ ይገብር።

ነቲ ስራሕ ትደልዮ ዲኻ? ስለዚ ምስቲ ቤት-ጽሕፈት ዕዮ ውዕል ትፍርም፣ ንሱ እውን እዩ ደሞዝካ ዝኸፍለካ። እቲ ቤት-ጽሕፈት ዕዮ ወግዓዊ ኣስራሒኻ እዩ። እቲ እትሰርሓሉ ትካል እቲ ክዉን ኣስራሒ እዩ። እዚ ማለት ኣብቲ ናይ ስራሕ ባይታ ሓላፊን ዝቖጻጸርን እቲ እትሰርሓሉ ትካል እዩ ማለት እዩ። ውሑስን ጥዑይን ናይ ስራሕ ቦታ ንኽህሉው ድማ እቲ ክዉን ኣስራሒ ሓላፍነት ይወስድ።

ብመንገዲ ቤት-ጽሕፈት ዕዮ ምስራሕ ብልጫታትን ጉድኣታትን ኣለዎ።

• እቲ ቤት-ጽሕፈት ዕዮ ዝሰማማዓካ ስራሕ ንኽትረክብ ይሕግዘካ።

• እቲ ቤት-ጽሕፈት ዕዮ ኣብ እዋን መስርሕ ምምልካት ስራሕ ክድግፈካ ይኽእል፣ ንኣብነት ናይ ድርኺት ደብዳቤ ኣብ ምጽሓፍን ምናልባት እውን ምስክር ወረቐት ኣብ ምርካብን።

• ብሓፈሻ ካብቲ ባዕልኻ ንስራሕ እተመልክተሉ እዋን ንላዕሊ ብመንገዲ ቤት-ጽሕፈት ዕዮ ዝያዳ ቀልጢፍካ ስራሕ ክትረክብ ትኽእል።

• መብዛሕትኡ ግዜ ውዕል ናይ መሰረዚ ገደብ-ግዜ የብልካን ወይ ሓጺር እዩ፣ ስለዚ ድማ ነቲ ስራሕ እንተድኣ ዘይፈተኻዮ ውዕልካ ብቐሊሉ ክትስርዞ ትኽእል።

• ብመንገዲ ቤት-ጽሕፈት ዕዮ ብቐሊሉ ምስ ዝተፈላለዩ ትካላትን ዓይነታት ስራሕን ክትላለይ ትኽእል።

• እቲ እትሰርሓሉ ትካል እውን ሓጺር ውዕል ናይ መሰረዚ ገደብ-ግዜ እዩ ዘለዎ፣ ስለዚ ድማ መብዛሕትኡ ግዜ ኣብ ውሽጢ ሒደት መዓልታት ንውዕልካ ክስርዞ ይኽእል እዩ።

• መብዛሕትኡ ግዜ ብመንገዲ ቤት-ጽሕፈት ዕዮ ዝኽፈል ደሞዝ ካብቲ ብቐጥታ በቲ ትካል ተቖጺርካ እንተትኸውን እትረኽቦ ዝውሕድ እዩ። እዚ ዝኾነሉ ምኽንያት ድማ እቲ ቤት-ጽሕፈት ዕዮ እውን ካብቲ እትሰርሓሉ ትካል ገንዘብ ስለ ዝረክብ እዩ።

• ብመንገዲ ቤት-ጽሕፈት ዕዮ ኣብኡ ትሰርሕ እንተድኣ ኮይንካ፣ እቲ እትሰርሓሉ ትካል ብቐሊሉ ብቀጥታ ክቖጽረካ ኣይክእልን እዩ። ነዚ ዝምልከቱ ሕግታት ኣለዉ።

ኣብ ኔዘርላንድ ብዙሓት ዝተፈላለዩ ኣብያተ-ጽሕፈት ዕዮ ኣለዉ። ኣብዚ ታሕቲ ብርክት ናይ ዝበሉ ፍሉጣት ኣብያተ-ጽሕፈት ዕዮ ሓፈሻዊ ትሕዝቶ ክትረክብ ኢኻ፡