ምንጪ፡ IND
ዓንቀጽ

ምስ IND ዝግበር 2ይ ቃለ-መሕትት

ናይ መወዳእታ ዝተሓደሰሉ: 25/9/2024 11:31 ቅ.ቀ.

ምስ ቤት-ጽሕፈት ኣገልግሎት ኢሚግሬሽንን ዜግነትን (IND) 2ይ ቃለ-መሕትት ክህልወካ እዩ። እዚ ንዘመልከትካዮ ዑቕባ ኣገዳሲ ዝኾነ ቃለ-መሕትት እዩ። ንምንታይ ከም ዝሃደምካ ድማ ብዝርዝር ትገልጽ። ጠበቓን ሕክምናዊ መርመራን ድማ ክትረክብ ኢኻ።

ቅድሚ 2ይ ቃለ-መሕትት ጠበቓ ክምደበልካ እዩ

ምስ

ኣገልግሎት ኢሚግሬሽንን ዜግነትን (IND)
2ይ ቃለ-መሕትት ቅድሚ ምግባርካ ጠበቓ ክምደበልካ እዩ። ነዚ ባዕልኻ ምምራጽ ኣየድልየካን እዩ፣ የግዳስ ብኣውቶማቲክ እዩ ዝምደበልካ። ካብ VluchtelingenWerk ሓበሬታ ድሕሪ ምርካብካ፣ ከባቢ ሓደ መዓልቲ ድሕሪካ ምስ ጠበቓኻ ዝርርብ ክህልወካ እዩ። ጠበቓ ካብ
ቦርድ ሕጋዊ ሓገዝ (RvR)
 እዩ ዝምደበልካ። እቲ ጠበቓ ብዛዕባ መስርሕ ዑቕባ ተመኩሮ ዘለዎ እዩ። ንጠበቓ ክትከፍል ድማ ኣየድልየካን እዩ። ጠበቓ ባዕልኻ ከተዋድድ ዲኻ ትመርጽ? ከምኡ እውን ይከኣል እዩ። ስለዚ ብድሕሪኡ እቲ ጠበቓ ንRvR ጠበቓኻ ከም ዝኸውን ባዕሉ ክሕብር ኣለዎ። 

ጠበቓኻ ብዛዕባ እቲ ምስ IND እትገብሮ 1ይ ቃለ-መሕትት ምሳኻ ክዘራረብ እዩ፣ ከምኡ እውን ን2ይ ቃለ-መሕትት ንኽትዳሎው ክሕግዘካ ​​እዩ። ኣብቲ ምስ ጠበቓኻ እትገብሮ ዝርርብ ድማ ንዝርርብኩም ዝትርጉም ኣተርጓሚ ክግበረልካ እዩ። እቲ ጠበቓ ብዝተኻእለ መጠን ብግቡእ ንኽሕግዘካ ካባኻ ሰነዳት የድልዮ እዩ። ስለዚ ኣብቲ ናይ ምጽባይ ግዜ ብዝተኻእለ መጠን ንመንነትካን ናይ ህድማ ታሪኽካን ዝድግፉ ሰነዳት ክትእክብ ኣገዳሲ እዩ።

ቅድሚ 2ይ ቃለ-መሕትት ምስ ጠበቓኻ ትዛረብ

ቅድሚ ምስ

IND
እትገብሮ 2ይ ቃለ-መሕትት ምስ ጠበቓ ዝርርብ ክህልወካ እዩ። እቲ ጠበቓ ብዛዕባ ምስ IND ዝገብረካዮ 1ይ ቃለ-መሕትት ምሳኻ ክዘራረብ እዩ፣ ከምኡ እውን ን2ይ ቃለ-መሕትት ንኽትዳሎ ክሕግዘካ ​​እዩ። እቲ ጠበቓ ከም ናትካ ቋንቋ ዝዛረብ ምዃኑን ዘይምዃኑን ድማ ኣገዳስነት የብሉን። ኣብ ቆጸራኹም ኩሉ ግዜ ኣተርጓሚ ኣሎ። 

ናብ ጠበቓ ንኽትጎዓዝ ካብ COA ናይ ህዝባዊ መጓዓዝያ (OV) ናይ መዓልቲ ትኬት ንምርካብ ክትሓትት ትኽእል ኢኻ። በዚ ናይ መዓልቲ ትኬት ተጠቒምካ ድማ ናብ ጠበቓኻ ብነጻ ክትጎዓዝ ትኽእል ኢኻ። ካብን ናብን መዕቆቢኻ ኣብ እትጎዓዘሉ እዋን ኩሉ ግዜ ብቚዕ ትኬት የድልየካ እዩ። 

ን2ይ ቃለ-መሕትት ሕክምናዊ መርመራ ክትረክብ ኢኻ

ገለልተኛ ዝኾነት ናይ

MediFirst
ነርስ፣ ምስ
IND
 2ይ ቃለ-መሕትት ንኽትገብር እኹል ኣካላውን ኣእምሮኣውን ጥዕና ዘለካ ምዃንካን ዘይምዃንካን ክትምርምር እያ።

እቲ ሕክምናዊ መርመራ ብኸመይ ከም ዝካየድ ኣብዚ ታሕቲ ኣንብብ፡

ሕክምናዊ መርመራ

ን2ይ ቃለ-መሕትት ንምድላው ነዚ ክትፈልጥ ኣለካ

  • ኣብ እዋን ቃለ-መሕትት ሰራሕተኛ ናይ IND ብዛዕባ ምኽንያታት መህደሚኻ ሕቶታት ክሓተካ እዩ።

  • ኣብ መልስታትካ ምርኲስ ብምግባር ሰራሕተኛ ናይ IND ሕቶታት ምሕታት ይቕጽል።

  • እንተደሊኻ ልክዕ ከም ናትካ ጾታ ብዘለዎ ሰራሕተኛ ናይ IND ቃለ-መሕትት ክትገብር ትኽእል ኢኻ። ሰራሕተኛ ናይ IND ብዛዕባ እዚ ኣብ እዋን 1ይ ቃለ-መሕትት ክሓተካ እዩ።

  • ንምንታይ ከም ዝሃደምካ ብቕንዕና፣ ብዝርዝርን ብንጹርን ንገር።

  • ስለምንታይ ንዓኻ ብውልቂ ዑቕባ ከም ዘድልየካ ግለጽ። IND ብዛዕባ ኣብ ሃገርካ ዘሎ ሓፈሻዊ ኩነታት ይፈልጥ እዩ። ስለዚ ንምንታይ ብውልቂ ኣብ ሓደጋ ከም ዘለኻ ክትገልጽ ኣገዳሲ እዩ።

  • ሓደ-ሓደ ግዜ ብዛዕባ ህድማኻ ንኽትዛረብ ኣጸጋሚ እዩ። ብዛዕባ ዝኾነ ነገር ክትዛረብ እንተድኣ ኣጸጋሚ ኮይኑ ረኺብካዮ ብዛዕብኡ ብንጹር ንIND ንገር። ንሓደ ነገር ደጊም ዘይትዝክሮ እንተድኣ ኮይንካ እውን።

  • ምስ ህድማኻ ዝተኣሳሰሩ በሰላታት፣ ኣካላዊ ወይ ስነ-ኣእምሮኣዊ ጥርዓናት ኣለዉኻ ድዮም? ስለዚ ብዛዕባ እዚ ንIND ንገር። IND ሕክምናዊ መርመራ ንኽትገብር ከቕርበልካ ይኽእል እዩ።

  • እንተደሊኻ፣ ሓደ ሰራሕተኛ ናይ

    VluchtelingenWerk Nederland (VWN)
    ኣብቲ ቃለ-መሕትት ክርከብ ይኽእል እዩ። VWN ክድግፈካን ጸብጻብ ናይቲ ቃለ-መሕትት ከዳሉውን እዩ። VWN ምናልባት ካብቲ ናይ IND ዝፍለይ ሓበሬታ ጽሒፉ ክኸውን ይኽእል እዩ። ሓደ ሓደ ግዜ እዚ ሓበሬታ እዚ ኣገዳሲ እዩ። ናይ ዑቕባ ሕቶኻ እንተድኣ ተነጺጉን ይግባይ ክትብል ምስ እትደልይን ድማ፣ ነቲ ጸብጻብ ናይ VWN ኣብቲ ይግባይ ክትጥቀመሉ ትኽእል ኢኻ።

  • IND ናይቲ ቃለ-መሕትት ጸብጻብ ከዳሉው እዩ። ድሕሪ እቲ ቃለ-መሕትት ኣብ ዘሎ መዓልቲ ድማ ንስኻን ጠበቓኻን ብዛዕባ እቲ ናይ IND ጸብጻብ ትዘራረቡ። ኣብቲ ናይ IND ጸብጻብ ሓበሬታ እንተድኣ ጎዲሉ ወይ ቅኑዕ ምስ ዘይከውን ንጠበቓኻ ንገር።

ኣብቲ ምስ IND ዝግበር ቃለ-መሕትት ቋንቋኻ ዝዛረብ ኣተርጓሚ ኣሎ

ሰራሕተኛ ናይ IND ነቶም ሕቶታት ብቋንቋ ኔዘርላንድ እዩ ዝሓትት። ኣተርጓሚ ድማ ነዚ ክትርጉመልካ እዩ። ንመልስታትካ እውን እቲ ኣተርጓሚ ናብ ቋንቋ ኔዘርላንድ ክትርጉሞም እዩ። እቲ ኣተርጓሚ ገለልተኛ እዩ፣ ኣብ IND ዝሰርሕ ኣይኮነን፣ ከምኡ እውን ኣብቲ ብዛዕባ እቲ ዘመልከትካዮ ዑቕባ ዝውሰድ ውሳኔ ዋላ ሓንቲ ጽልዋ የብሉን። ኣተርጎምቲ ኣዝዩ ስራሕ ስለ ዝጽዕቆም ካልእ ላህጃ ዝዛረብ ኣተርጓሚ ክትረክብ ትኽእል ኢኻ። ንስኻን እቲ ኣተርጓሚን ጽቡቕ ገይርኩም ክትረዳድኡ እንተድኣ ዘይክኢልኩም ብቀጥታ ንገር። ምኽንያቱ እቲ ኣተርጓሚን ንስኻን ጽቡቕ ገይርኩም ክትረዳድኡ ብሰንኪ ዘይምኽኣልኩም ዘይምርድዳእ ከይፍጠር ኣገዳሲ ስለዝኾነ።

ነዚ ዓንቀጽ ከመይ ረኺብካዮ?

ተዛማዲ ትሕዝቶ