ሚኒስተር ፋበር፡ ጽኑዓት ሕግታት ዑቕባ ንምትእትታው "ቅልውላው ዑቕባ" ክትእውጅ ትፍትን ኣላ

ሚኒስተር ዑቕባን ፍልሰትን ማርዮላይን ፋበር ኣብ ኔዘርላንድ "ቅልውላው ዑቕባ" ክትእውጅ ከም እትደልይ

ቅልውላው ዑቕባ እንተድኣ ተኣዊጁ፣ ዝነበሩ ሕግታት ንግዚኡ ይቕየሩ ወይ ድማ ፍሉያት ናይ ህጹጽ እዋን ሕግታት ይተኣታተዉ ማለት ክኸውን ይኽእል እዩ። እዚ ማለት ድማ ​​ሒደት ዝቐርቡ ናይ ዑቕባ መመልከቲታት ይምስርሑ፣ ከምኡ እውን ነዋሕቲ ናይ ምጽባይ ግዜታት ይህልዉ፣ ወይ ምጥርናፍ ስድራ-ቤት ዝያዳ ይኸብድ ማለት ክኸውን ይኽእል እዩ።

መንግስቲ ቅልውላው ብሓቂ ቅድሚ ምእዋጁ ሕጋዊ ስጉምትታት ክኽተል ኣለዎ። ሰኔትን ባይቶ ወከልቲ ህዝቢን ፍቓድ ክህቡ ኣለዎም። ኮሚሽን ኤውሮጳ እውን ፍቓድ ክህብ ኣለዎ። እቲ ኮሚሽን መንግስቲ ኔዘርላንድ ከም መሰል ዑቕባን ምጥርናፍ ስድራ-ቤትን ዝኣመሰሉ ኣህጉራዊ ውዕላት ክኽተል ከምዘለዎ ድሮ ኣጠንቂቑ ኣሎ። ኔዘርላንድ ነዞም ሕግታት እንተድኣ ዘይተኸቲላ፣ ኮሚሽን ኤውሮጳ ንኔዘርላንድ ክቐጽዓ፣ ወይ ድማ ስምምዓት ንኸተኽብር ከገድዳ ይኽእል እዩ።

ብመሰረት ጸብጻብ NOS፣ ኮሚሽነር ኤውሮጳ ይልቫ ዮሃንሶን እውን መንግስቲ ኔዘርላንድ መጀመርታ ሰፊሕ መርመራ ከካይድ ከምዘለዎ ኣፍሊጣ ኣላ። ኔዘርላንድ ስቕ ኢላ ብቀሊሉ ቅልውላው ክትእውጅ ኣይትኽእልን እያ። መንግስቲ ኔዘርላንድ ንስደተኛታት ብግቡእ ንምእንጋድ ዝከኣሎ ኹሉ ገይሩ ክነሱ ክሰልጦ ከም ዘይከኣለ ኣብቲ መርመራ ከርእይ ኣለዎ።

"ቅልውላው ዑቕባ" ናይ ምእዋጅ ውጥን፣ ኣብ ዝቕጽሉ ኣዋርሕ ዘይርጉጽነት ከም ዝህሉው ዝገብር እዩ።  መንግስቲ ዋሕዚ ሓተትቲ ዑቕባ ናብ ኔዘርላንድ ንምንካይ ዝዓለሙ ሓያሎ ውጥናት ይሰርሓሎም ኣሎ። እዞም ውጥናት ብልክዕ እንታይ ምዃኖምን፣ ኣብ ልዕሊ መስርሕ ዑቕባ ወይ ምጥርናፍ ስድራ-ቤት እንታይ ጽልዋ ክህልዎም ምዃኑን ግን ክሳብ ሕጂ ንጹር ኣይኮነን። ዋላ ቅልውላው እንተተኣወጀ እውን ኩሉ ነገር ብቕጽበት ከምዘይቅየር ምፍላጥ ድማ ኣገዳሲ እዩ። ሓደስቲ ሕግታት ቅድሚ ምትእትታዎም ብዙሓት ሕጋዊ ስጉምትታት ምኽታል የድልይ እዩ።