ናይ ኤውሮጳ ሓደስቲ ሕግታት ዑቕባ ብወግዒ ጸዲቖም

ኩለን ኣባላት ሃገራት ሕብረት ኤውሮጳ ነቲ ውጥን ክሳብ ዝሰማማዓሉ 8 ዓመት ወሲዱለን። ኣብቲ እዋን ኣብ መንጎ ኣባላት ሃገራት ብዙሕ ምምይጥ ይካየድ ነይሩ። ኣብ ግዳማዊ ዶባት ዝርከባ ዝኣመሰላ ገሊአን ሃገራት ንበይነን ኣብ መከራ ዝተሓድጋ ኮይኑ ተሰሚዕወን። ካልኦት ሃገራት ስደተኛታት ክቕበላ ዘይደልያ ብምንባረን ድማ ተቖጢዐን። ኔዘርላንድ እትርከቦም ካልኦት ሃገራት ድማ እተን ኣብ ዶብ ዝርከባ ሃገራት ስደተኛታት ጒዕዝኦም ንኽቕጽሉ ብምፍቓደን ቚጥዐ ነይሩወን።

እቶም ሓደስቲ ሕግታት ገና ብቕጽበት ተግባራዊ ኣይክኾኑን እዮም። ሃገራት ሕብረት ኤውሮጳ ነቶም ሕግታት ኣብ ሃገረን ንምትግባር ናይ 2 ዓመት ግዜ ኣለወን። ኩለን ሃገራት ሕብረት ኤውሮጳ ነዞም ሓደስቲ ሕግታት ክኽተላ ኣለወን። እተን ሃገራት ኣብ ውሽጢ 2 ዓመት ነቶም ሕግታት ብሃገር ደረጃ ክትግብረኦም ምስ ዝሰልጠን ድማ እቶም ሕግታት ካብ መፋርቕ 2026 ጀሚሩ ኣብ ግብሪ ክውዕሉ እዮም።

ሕብረት ኤውሮጳ፣ ምስተን ኣብ ውሽጢ ሕብረት ኤውሮጳ ዑቕባ ክሓቱ ዝደልዩ ሰባት ዝብገሱለን ሃገራት ስምምዕ ክገብር እውን ይደልይ እዩ። ሕብረት ኤውሮጳ ዑቕባ ንዘይተዋህቦም ሰባት ናብ ሃገሮም ክመልሶም ክኽእል እዩ ዝደልይ። እዚ እንተዘይሰሊጡ፣ ማእከላት መዕቆቢ ቀልጢፎም ኣዝዮም ክመልኡ እዮም።

ሕብረት ኤውሮጳ፣ ኣብ ግዳማዊ ዶባት ኤውሮጳ ምስ ዝርከባ ሃገራት እውን ስምምዕ ክገብር ይደልይ እዩ።

ንእሽተይ ኣብዛሓ ዘለዎ ባይቶ ወከልቲ ህዝቢ ኔዘርላንድ ነዞም ሓደስቲ ሕግታት ይድግፍ እዩ። ብዙሓት ውድባት ተጣበቕቲ ሰብኣዊ መሰላት ግን ነዚ ኣይድግፍዎን እዮም። ኣብ ኔዘርላንድ፣ Oxfam Novib፣ Artsen zonder Grenzen፣ VluchtelingenWerk Nederland፣ Pax ከምኡ እውን Stichting Vluchteling ዝርከብዎም ውድባት ኣንጻር እዞም ሕግታት ምዃኖም ኣፍሊጦም ኣለዉ። 

ኔዘርላንድ ኣንጻሩ ንኸተድምጽ ሓቲቶም፣ ንኻልእ ነገራት ሓዊስካ ድማ እዚ ነቲ ናብ ኤውሮጳ ዝወስድ መህደሚ መንገድታት ዝያዳ ሓደገኛ ከምዝኸውን ዝገብር ኮይኑ ረኺቦሞ።